Kenya inataka hatua thabiti kulinda misitu ambayo inapungua

 

MKE wa Rais wa Kenya Bi. Margaret Kenyatta ametoa wito kuchukuliwa hatua kwa haraka na thabiti ili kurejesha na kulinda misitu ambayo inazidi kupungua nchini humo. 

Bi. Margaret amesema inahitajika azma ya pamoja na uthubutu wa wakenya wote ili kurudisha misitu iliyofutika kufuatia shughuli za kibinadamu na uharibifu uliotokana na mabadiliko ya hali ya hewa. 

Akizungumza hayo kwenye msitu wa Kibiku katika kaunti ya Kajiado, alisema suala hilo halihitaji kusubiri, hatua zinapaswa kuchukuliwa kwa haraka, thabiti na mwitikio uwe ni kwa wadau wote, binafsi na umma ili kuhimiza mabadiliko ya kitabia kwa ajili ya kukabiliana na matishio hayo yanayotokana na shughuli za kibinadamu. 

Kibiku ni miongoni mwa maeneo matano ya hifadhi ambayo kwa sasa Jeshi la ulinzi la Kenya limeazimia kuyarejesha. 

Kwa mujibu wa wizara ya Mazingira, kwa sasa misitu inafunika eneo la ukubwa wa asilimia 6.2 na serikali imeongeza juhudi ili kufikia lengo la Umoja wa Mataifa la asilimia 10 katika siku za badaye.