Pombe Haramu, Dawa za Kulevya zinavyoteketeza Vijana Wilaya ya Micheweni, Serikali yaamua kuingilia kati

 

SERIKALI ya Mkoa wa Kaskazini Pemba imesema vita dhidi ya dawa za kulevya haitakoma licha ya baadhi ya wananchi kutoridhishwa na juhudi zinazochukuliwa katika kukabiliana na matendo hayo.

Mkuu wa Mkoa huo Omar Khamis Othman ameyaeleza hayo baada ya kushiriki zoezi la kuteketeza madumu 39 ya pombe haramu aina ya Gongo katika shehia ya Kifundi Wilaya ya Micheweni.

Amesema msako wa kuwasaka wanaofanya biashara hiyo ni endelevu ambapo wananchi wanatakiwa kutoa taarifa kwa viongozi wakiona kuwa viashiria vya  biashara hiyo.

Madumu hayo yamekamatwa wakati wa opresheni ya kupaambana na madawa ya kulevya inayosimamiwa na Mkuu wa Wilaya ya Micheweni Salama Mbarouk Khatib.

Amesema kazi zinazofaanywa na vikosi vya ulinzi Wilaya ya Micheweni kwa kushirikiana na Polisi Jamii, zinapaswa kuungwa mkono na kima mmoja kwani zina lengo la kudhibiti matendo maovu ikiwemo wizi wa mzao na mifugo.

‘Natoa pongezi kwa vikosi vya ulinzi na usalama pamoja na polisi jamii kwa kufanikisha kukamata madumu haya, kama yasingekamatwa vijana wengi wangeathirika, iendeleeni na kazi hii na S erikali ya Mkoa iko pamoja nanyi” alisema.

Naye kaimu Mkuu wa Wilaya ya Micheweni Abeid Juma Ali amesema serikali itapambana na mtu yeyote na wa aina yeyote na wakati wowote ikiwa atabinika kujihusisha na vitendo viovu ikiwemo uuzaji wa pombe haramu  na dawa za ulevya.

Ameeleza kuwa Serikali itapambana na mtu yeyote na wa aina yeyote ambaye tutambaini kuwa na anachangia kuharibu afya za wananchi wetu .

“Mtu yote ambaye atabainika kuharibu afya za wananchi tutapambana naye, wapeni salamu,tutahakikisha tunawatafuta popote na mahala popote walipo ’’alieleza.

Kwa upande wake Fakih Yussuf akizuzngumza kwa niaba ya Jeshi la Polisi Mkoa huo amewataka wananchi kudumisha ushirikiano na jeshi la polisi hasa katika kipindi hichi cha kuelekea mfungo wa mwezi wa ramadhan kwa kutoa taarifa sahihi zinazohusu matukio au viashiria vya kufanyika uhalifu.

Fakih amesema bila ya wananchi kushirikiana na Jeshi la Polisi, itakuwa ni vigumu kuweza kudhibiti matendo maovu , na kuwapongeza Polisi waliofanikisha  kukamatwa kwa pombe hiyo kabla haijaingia sokoni na kuathiri vijana wengi ambao ni nguvu kazi ya taifa.

Hata hivyo Hamad Bakar kiongozi wa Polisi Jamii kijini cha Kipangani Shehia ya Kifundi , ameiomba Serikali ya Mkoa kuwapatia vitendea kazi ikiwemo viatu kwa ajili ya kutumia wanapokuwa katika operesheni .

Amesema polisi jamii weengi wamevinjika moyo kutokana na kukosa kipato kama walivyodhania, na waliobaki watahakikisha wanafanya kazi hiyo kwa moyo na juhudi zao zote, wakitekeleza kazi ya kujitolea.

Zoezi la kuteketeza pombe hiyo haramu limefanyika katika kituo cha Polisi Matangatuani Shehia ya Kifundi na kuhudhuriwa pia na kamati ya Ulinzi na Usalama ya Wilaya ya Micheweni.