'Masheha, Jeshi la Polisi Shirikianeni kutokomeza Uharifu Micheweni'- DC Salama

MASHEHA pamoja na Jeshi la Polisi Wilaya ya Micheweni wametakiwa kufanya kazi kwa mashirikiano ili kupambana na matendo ya kihalifu ambayo yanafanywa na wananchi katika shehia zao.

Ushauri huo umetolewa na Mkuu wa wilaya ya Micheweni Bi Salama Mbarouk Khatib katika ukumbi wa mikutano wa skuli ya Micheweni Sekondari wakati alipokuwa akizungumza na masheha pamoja na polisi wa shehia waliomo ndani ya wilaya hiyo.

Amesema  jeshi la Polisi endapo litafanya kazi kwa karibu na kushirikiana na masheha matendo mbalimbali ya kihalifu yatapungua katika wilaya ya Micheweni.

Kwa upande wake Mkuu wa upelelezi wa Makosa ya jinai Wilaya hiyo Mussa Khatib Vuai ambae pia ni kaimu Mkuu wa Polisi wilaya hiyo amesema usalama wa nchi yeyote unahitaji mawasiliano ya karibu kati ya taasisi na taasisi, hivyo ni budi kwa masheha kufanya mawasiliano ya karibu na jeshi la polisi pindi tu matukio yanapotokea.

Amesema masheha ni jukumu lao kufanya vikao kwa kushirikiana na askari wa shehia zao ili kuhakikisha wanaandaa mikakati madhubuti ya kupambana na wahalifu katika shehia zao.