RC KAS PEMBA: Ni jukumu la kila Mmoja kudhibiti Mikarafuu Inayopandwa

 

WIZARA ya Kilimo, Maliasili, Mifugo na Uvuvi ameshauriwa kuendelea kusimamia agizo la serikali la kuimarisha zao la karafuu kwa kuhakikisha mikarafuu inapandwa kwa wingi katika mashamba ya serikali na ya watu binafsi.

Ushauri huo umetolewa na Mkuu wa Mkoa wa Kaskazini Pemba, Omar Khamis Othman, wakati akizundua zoezi la upandaji wa miche ya mikarafuu katika shamba la serikali lililoko Gando wilaya ya Wete. 

Alisema karafuu ni moja ya zao linalosaidia kukuza uchumi wa nchi na wananchi wake, hivyo ni jukumu la kila mmoja kuienzi na kuitunza mikarafuu ili iendelee kuchangia pato la taifa.

“Ni jukumu la kila mmoja wetu uhakikisha anasimamia udhibiti wa mikarafuu inayopandwa ili iweze kustawi na kutumika kwa ajili ya kuchangia uchumi wa nchi na wananchi wake,” alisema.

Aidha alieleza kwamba kupitia zao la karafuu serikali inapata fedha za kigeni na hivyo kuchangia maendeleo ya taifa kwa kusaidia miradi ya maendeleo na huduma za kijamii.

 Kaimu Ofisa Mdhamini wizara hiyo, Issa Nasor Ali, alitaja mikakati inayochukuliwa kukabiliana na upungufu wa mikarafuu ikiwa ni pamoja na kupanda mikarafuu kwenye mashamba ya serikali.