'Sina Msamaha kwa Fisadi wa Pesa za Umma'- Dk. Shein

 

MAKAMU Mwenyekiti wa CCM Zanzibar, Dk. Ali Mohamed Shein, amesema uchumi wa Zanzibar umeendelea kuimarika kutokana na uongozi thabiti wa Chama Cha Mapinduzi (CCM) na kusisitiza kuwa hatokuwa na msamaha kwa yeyote atakaebainika kufanya ubadhirifu wa fedha za umma.

Dk. Shein aliyasema hayo katika ukumbi wa Jamhuri Wete wakati alipokuwa akizungumza na mabalozi wa wilaya ya Wete, mkoa wa kaskazini Pemba.

Alifahamisha kuwa uchumi wa Zanzibar umekuwa ukiimarika kwa kiasi kikubwa na kutumia fursa hiyo kuendelea kusisitiza kauli yake aliyoitoa katika maadhimisho ya kilele cha Mei Mosi mwaka huu, kuwa wale wote wanaodiriki kufanya ubadhirifu wa fedha za umma watashughulikiwa.

Alieleza jinsi Zanzibar ilivyokuwa na uwezo mkubwa wa kifedha na uchumi hatua iliyompelekea kuongeza mishahara mara nne katika uongozi wake sambamba na kuimarikaka kwa sekta za maendeleo.

Aliendelea kusisitiza kauli yake kuwa ataendelea kuiongoza Zanzibar kwa uadilifu mkubwa na kusisitiza kuwa viongozi wote walioteuliwa wanatekeleza ilani ya CCM.

Aliwaeleza viongozi hao kuwa ujenzi wa Chuo cha Amali cha Daya-Mtambwe utaanza hivi karibuni na ujenzi wa barabara ya Finya-Kicha itakayojengwa kwa kiwango cha lami sambamba na kuzitafutia ufumbuzi changamoto nyengine walizoziorodhesha.

Akiwaeleza wajibu wao kwa mujibu wa katiba ya CCM, aliwaeleza viongozi hao wajijue kuwa wao ni wenezi na wahamasishaji wakuu wa CCM pamoja na kuwa na wajibu wa kuwaeleza wanachama katika maamuzi yote ya CCM na kufikisha mapendekezo ya wanachama katika vikao vya juu.

Alisema wanaCCM wote wakiwemo viongozi hao wana kazi kubwa ya kufanya katika kusaidia ushindi wa CCM na kila mmoja kwa ngazi yake kwa namna yake na kuwa na wajibu wa kufanya yeye mwenyewe kwa uwezo wake kusaidia ushindi huo.

Aidha, alisisitiza kuwa ushindi kwa CCM ni suala la lazima kutokana na maelekezo ya katiba ya chama hicho na hakuna mbadala wa ushindi kwa kufuata taratibu na namna zote za kidemokrasi kwa lengo la kuyalinda Mapinduzi ya Januari 12,1964 pamoja na Muungano wa Tanganyika na Zanzibar.

CHANZO: ZANZIBARLeo