Uharibifu wa Miundombinu ya Barabara Kusini Pemba kikwazo kwa Wasafiri

WADAU wa usafari Mkoa wa Kusini Pemba, wamesema kukosekana usimamizi na matumizi sahihi wa barabara inachangia kutokea  uharibifu wa miundombinu ya barabara na kuharibika  haraka.

Wamesema kukosekana usimamizi madhubuti wa miundo mbinu ya barabara, kunachangia uharibifu mkubwa wa barabara hizo hali ambayo pia inachangia ajali za barabarani.

Katibu wa Jumuiya ya Madereva Mkoa wa huo Hafidh Mbaraka Salim amesema ni vyema taasisi husika kuchukua hatua  za makusudi kudhibiti magari yenye uzito kupindukia kupita kwenye barabara huku taasisi husika zinashindwa kuchukua hatua stahiki .

“Ukiangalia barabara nyingi zimefanya nyufa, hii ni kukosekana kwa usimamizi wa matumizi mazuri ya miundombinu hiyo, kwani magari yanayobeba mizigo yenye uzito mkubwa kuzitumia bila ya kuchukuliwa hatua za kisheria” alieleza.

Katika taarifa yake kwa ujumbe wa Bodi ya Usafiri , Hafidh ametaja sababu nyengine ambazo zinachangia uharibu wa miundombinu hiyo kuwa ni shughuli za ujenzi kwa baadhi ya wananchi kujenga nyumba bila ya kuzingatia utaraibu wa mipango miji.

Mkurugenzi wa Idara ya Leseni na Usafiri Zanzibar Suleiman Kirobo amesema wameshindwa kuchukua hatua kwa magari hayo kutokana na kukosekana kifaa cha kupimia uzito wa gari hizo .

Kirobo amefahamisha  kuwa Idara hata gari za mchanga zimekuwa zikifanya udanganyifu katika upakiaji wa mchanga ambaapo madereva huchukua mchanga mwingi kuliko uwezo wa gari.

“Hata magari yanayochukua mchanga yanachangia uharibifu  wa miundombinu ya barabara, kwani yanachukua mzigo mzito kupita uwezo wake” alifahamisha.

 Mwenyekiti wa bodi ya Usafiri Mustafa Haji Mussa amesema kuwa taasisi husika zimeshindwa uchukua hatua za kisheria dhidi ya magari hiyo kutokana na ukosefu wa mizani ya kupimia uzito wa kila gari yenye mzigo.

Aidha  ameeleza kuwa iwapo Serikali itamiliki kifaa hicho, mbali na kudhibiti matumizi mabaya ya barabara, pia itasaidia kupunguza ajali za barabarani ambazo zimekuwa zikitokea na kusababisha vifo na ulemavu wa maisha kwa baadhi ya wananchi .

“Imekuwa ni vigumu kuweza kuyabaini na kuwatia hatiani wahusika, kwa sababu hakuna mezani ya kupimia uzito wa magari hayo” alifahamisha .

Mkuu wa kitengo cha usalama wa barabara wa jeshi la Polisi Zanzibar Robert Patriki Hossein amewataka madereva na wananchi kufuata sheria za usalama barabara bila ya kushurtishwa ili kuzuia ajali za barabarani.