Kuelekea Mwezi wa lishe na Afya ya Mtoto Pemba, Jamii yashauriwa haya

JAMII imeshauriwa kuendelea kuzingatia suala la utumiaji wa lishe bora kwa akinamama wajawazito pamoja na watoto ili kuwawezesha kuimarisha kinga dhidi ya magonjwa mbalimbali nyemelezi.

Akizungumza na waandishi wa habari katika uzinduzi wa mwezi wa lishe na Afya ya Mtoto, Mkuu wa kitengo cha Lishe Pemba, Raya Mkoko Hassan amesema kuwa Wizara ya Afya kupitia kitengo hicho wanautumia mwezi huu kwa kutoa huduma mbalimbali ikiwemo Matone na Dawa za Minyoo.

Raya amesema kuwa jamii nyingi zimekuwa hazizingatii ushauri wa kitaalam juu ya ulaji wa mlo kamili hasa kwa akinamama wajawazito na watoto hivyo kupelekea madhara mbalimbali ikiwemo Utapiamulo na hata kuharibika kwa baadhi ya mimba.

Awali akichangia Mratibu wa lishe Wilaya ya Mkoani, Mwajine Khamis Mjaka amevitaka vyombo vya habari kuendelea kupaza sauti kuwahamasisha wanajamii juu ya umuhimu wa Lishe bora katika maisha yao.

Waandishi wa habari walioshiriki kikao hicho wakimsikiliza  mkuu wa kitengo cha Lishe Pemba, Raya Mkoko Hassan akiwasilisha mada

Mwajine amesema kuwa licha ya changamoto zinazojitokeza katika baadhi ya maeneo kuhusiana na zoezi hilo, lakini vyombo vya habari vinalojukumu kubwa kuhakikisha jamii inapata elimu ya lishe.

Zoezi la utoaji wa chanjo ya lishe na Afya ya Mtoto Pemba hufanyika kila ifikapo miezi ya June na Desemba ya kila mwaka  ambapo takwimu zinaonesha kwamba kwa mwaka 2017 zoezi hilo lilifanikiwa zaidi ya 90%   .