RC KAS PEMBA: 'Serikali itaendelea kutumia rasilimali zake kutoa huduma bora za matibabu kwa wananchi '

 

SERIKALI ya Mkoa wa Kaskazini Pemba imesema itaendelea kutumia rasilimali  zake zinazopatikana ndani ya Mkoa ikiwemo madaktari kwa ajili ya kutoa huduma bora za matibabu kwa wananchi .

 Hayo yameelezwa na Mkuu wa Mkoa wa Kaskazini Pemba Mhe Omar Khamis Othman wakati alipotembelea Hospitali ya Micheweni ambayo inatarajia kupandishwa hadhi ya kuwa hospitali ya Wilaya.

Amesema pamoja na changamoto ya upungufu wa Madaktari katika Hospitali hiyo, lakini ni vyema waliopo kufanya kazi kwa weledi, juhudi na kuagiza  uongozi wa Hospitali hiyo kuwachukulia hatua Madaktari wazembe.

Aidha Mkuu huyo wa Mkoa amesema kuwa wakati Hospitali hiyo inaelekea kuwa Hospitali ya Wilaya, Serikali ya Mkoa itahakikisha azma hiyo inafanikiwa na wananchi wa Micheweni waendelee kunufaika na matunda ya Serikali yao ya  awamu ya saba.

Naye Mkuu wa Wilaya ya Micheweni Salama Mbarouk Khatib amesema maandalizi ya Hospitali hiyo kufikia hadhi ya kuwa Hospitali ya Wilaya yanaendelea vyema ambapo baadhi ya vifaa vya upasuaji vimeshawasili .

Daktari Dhamana wa Hospitali hiyo Mbwana Shoka amesema tayari jengo la operesheni ya akinamama limekamilika kwa zaidi yaaslimia tisini.

Shoka amefamamisha kwamba baada ya kukamilika ujenzi wa jengo la upasuaji wa akinamama , bado jengo la upasuaji wa jumla halijakamilika na kuiomba Serikali ya Mkoa kusaidia hatua iliyofikia ili jengo hilo nalo likamilike .