Waziri SMZ: 'huduma usafishaji Figo ‘Dialysis’ katika Hospitali ya Mnazimmoja zitaendelea kutolewa bila ya malipo'

WAZIRI wa Afya, Hamad Rashid Mohammed amesema huduma usafishaji figo ‘dialysis’ katika hospitali ya Mnazimmoja zitaendelea kutolewa bila ya malipo.

Waziri huyo alieleza hayo katika hospitali ya Mnazimmoja wakati alipofanya ziara kukitembelea kitengo cha huduma za usafishaji figo na kueleza kuwa huduma hizo zitaendelea kutolewa bure.

Alisema lengo la ziara yake katika kitengo hicho, ni kuona jinsi wananchi wanavyofaidi na huduma hizo, hasa ikizingatiwa kuwa serikali inataka kuhakikisha kuwa wananchi wanapata huduma za afya za uhakika ndani ya nchi.

Aidha alisema serikali kupitia wizara ya Afya kwa kuwajali wananchi iko imara katika kuhakikisha inakipa kipaumbele kwa kukipatia vifaa kitengo hicho pamoja na dawa kwa wagonjwa wanaofika kwenye kitengo hicho kusafishwa figo.